Ғафлат таҳоратни бузадими?

Савол: Ғафлат таҳоратни бузадими? Бундай пайтда мусулмон таҳоратини тўкис қилиши керакми?

Жавоб: Мен (савол берган одамнинг) ғафлатдан нимани назарда тутганини билмайман. Уйқуни назрда тутаяптими? Агар уйқуни назарда тутаётган бўлса, чуқур уйқуга кетиш таҳоратни бузади. Чуқур уйқуга кетишнинг аломати, ухлаган одамнинг таҳорати бузилганини билмаслигидир. Шундай уйқуга кетган одам, Софван ибн Ассол разияллоҳу анҳу ривоят қилган ушбу ҳадисга кўра, таҳорат қилиши керак: «Расулуллоҳ соллаллоҳу алайҳи ва саллам сафарда бўлсак уч кеча ва уч кундуз давомида, жанобатдан ташқари, катта ва кичик ҳожат ҳамда уйқу сабабли пойафзалларимизни ечмасликка буюрар эдилар» (Термизий «Сунан» 1/ 106, 107. Насоий «Сунан» 1/83. Ибн Можжаҳ «Сунан» 1/161).

Расулуллоҳ соллаллоҳу алайҳи ва саллам айтдилар: «Кўз – кетнинг боғидир. Кўзлар ухласа боғлар ечилади» (Абу Довуд «Сунан» 1/51. Ибн Можжаҳ «Сунан» 1/161. Дору Қутний «Сунан» 1/161).

Агар сўраётган одам ғафлатдан уйқуни назарда тутган бўлса, унинг жавоби шудир.

Агар уйқу таҳорат бузилганини биладиган даражада енгил бўлса ва ухлаган одам ўтирган ҳолатда бўлса, бу уйқу таҳоратни бузмайди. Чунки бу ердаги ҳар бир нарса ҳис этишга: нарсаларни ҳис этиш ва тушуниб туришга боғлиқдир.

Агар сўраётган одам «ғафлат»дан Аллоҳнинг зикридан ғафлатда қолишни назарда тутаётган бўлса, бу – таҳоратни бузмайди. Бироқ, банда Аллоҳни ҳар он мудом зикр қилиши керак. Аллоҳ таоло айтди:

«Осмонлар ва Ернинг яралишида ҳамда кеча ва кундузнинг алмашиниб туришида ақл эгалари учун (бир яратувчи ва бошқариб тургувчи зот мавжуд эканлигига) оят-аломатлар борлиги шубҳасиздир. Улар турганда ҳам, ўтирганда ҳам, ётганда ҳам Аллоҳни эслайдилар ҳамда осмонлар ва Ернинг яралиши ҳақида тафаккур қилиб (дейдилар): «Роббимиз, бу (борлиқ)ни беҳуда яратганинг йўқ! Сен (беҳуда бирон иш қилиш айбидан) поксан! Ўзинг бизни жаҳаннам азобидан асра!»» (Оли Имрон: 190, 191).

«Ақл эгалари» – оқил инсонлардир.

Аллома Солиҳ Фавзон ал-Фавзон

«ал-Мунтақо мин фатаавал-Фавзаан: Китабут-Тоҳараҳ»,

учинчи жилд, ўн тўртинчи савол.

Манба: Ҳикмат Нури